歲月何止不留人，亦令好多傳統行業萎縮，就好似擁有30幾年歷史嘅瑞興皮廠，喺上世紀嘅80、90年代風光一時，可惜今時今日皮革製造業喺香港已經變成夕陽工業。Kean係瑞興皮廠嘅第三代接班人，佢接手嗰刻，絕對唔係「老豆剩落大把」畀佢慢慢玩，而係連佢阿爸都想就此結束呢盤不斷式微嘅家族生意。但喺皮廠長大嘅Kean，卻沾染咗一種倔強嘅「牛脾氣」，唔想皮廠就咁玩完。但始終喺香港，生產皮革已經唔再係一條搵錢嘅康莊大道，唯一可以做嘅就係變革，Kean嘅求生招式唔係靠減價喺市場上委屈求全，而係靠生產樹膏皮，同時創立自家品牌，開拓產品銷售渠道。90後嘅佢胸懷大志，力求打破「富不過三代」呢個魔咒。

受訪者簡介：

白浩謙（Kean），瑞興皮廠第三代接班人及The Lederer創辦人

Kean當年10幾歲就開始喺屋企嘅皮廠幫手，佢冇因此嫌棄呢間被列為污染行業嘅皮廠，反而培養咗一份深厚感情。2014年佢喺外國讀完書返嚟，見到香港嘅皮革製造業一片暗淡，皮廠嘅生意額又不斷下跌，要喺一係做、一係唔做呢個局面上抉擇，佢選擇咗前者，一來想守護呢個家族事業，二來唔想父母面對皮廠結業而變得無所事事。男人嘅嘢都真係話變就變，Kean逐步為皮廠帶來變革，又創立自家品牌The Lederer。佢相信只要勤力及識得善用家族喺皮革業嘅人脈網絡，唔單止可以令皮廠生意起死回生，亦可以延續香港嘅皮革製造業。